Пушкăртстанра «Соседи по огню» литературăпа çутӗç проекчӗ хута кайнă

ПР Пуçлăхӗн Грантсен фончӗ пулăшнипе куçаруçăсем Пушкăртстан Республикинчи Писательсен союзӗнче тăракан хуть хăш пушкăртла е тутарла çыракан çыравçăн произведенине вырăсла куçарса кăларма пултараççӗ. Вулакансен вара çапла майпа пушкăрт çыравçисен хайлавӗсемпе вырăсла паллашма май пулать.

Проектăн кӗнеке кăлармалли фончӗ 1500000 тенкӗпе танлашать.

Паянтан, августăн 1-мӗшӗнчен, ПР Писательсен союзӗ йӗркеленӗ проекта хутшăнас текенсен хушшинче суйлав конкурсӗ пуçланнă. Куçаруçăсем çак номинацисенче ӗçлеме пултараççӗ:

× Пысăк калăпăшлă проза (роман, повесть куçарăвӗ);

× Проза пуххи (калавсемпе эссесем);

× Поэзи (сăвăсем, поэмăсем);

× Ачасемпе çамрăксем валли çырнă чи лайăх хайлав;

× Классик (Пушкăртстан литературин классикӗн хайлавӗн куçарăвӗ).

Конкурса хутшăнас текенсенчен заявкăсем сентябрӗн 30-мӗшӗччен йышăнаççӗ. Экспертсем кандидатсене пăхса тухса хакласан октябрӗн 31-мӗшӗнче 5 çӗнтерӳçе палăртаççӗ – кашни номинацире пӗрер. Çӗнтерӳçӗ-куçаруçăсен хăйсем суйласа илнӗ произведение икӗ уйăх хушшинче куçарса пӗтермелле пулать, унтан вӗсем хатӗрленӗ произведенисене калăпласа кӗнеке издательствинче кун çути кăтартӗç.

Пушкăртстанри Писательсен союзне ертсе пыракан пултаруллă çыравçа Айгиз Баймухаметова «Сувар» хаçата вулакансем те аван пӗлеççӗ. Шăпах вăл тăрăшнипе пурнăçланать те çак проект. Проектăн ятне мӗншӗн-ха «Соседи по огню» ят панă? Мӗне пӗлтерет вăл?

«Пушкăртсен «сосед по огню» текен каларăш пур. Çапла вӗсем килти вучахра çулăм сӳнсен хуть хăш вăхăтра та кăвайт пама хирӗç мар кӳршине каланă. Паян Пушкăртстан литературин çулăмӗ пур вăйран çунать, анчах та куçаруçăсене тӗрев паманнипе вырăсла вулакансене ăшăтаймасть. Эпир çак тӗрӗсмарлăха тӳрлетесшӗн, литературăри ырă кӳршӗлӗхӗн йăлисене çӗнӗрен чӗртсе тăратасшăн», – тесе ăнлантарать кун пирки Айгиз Гиззатович.

А.Баймухаметов архивӗнчи сăнӳкерчӗк.