Шкулта вӗреннӗ чухнех пурнăçне медицинăпа çыхăнтарма шутланă Анастасия Матросова. Паян вăл – Чистайри тӗп больницăн ача-пăча поликлиникин çамрăк педиатрӗ. Унăн ӗçӗнче савăнăç валли те, иккӗленӳ валли те вырăн пур, анчах пӗри улшăнмасть: ачасене юратни тата вӗсене сывă курас килни.
Анастасия Чистайра çуралса ӳснӗ. 9-мӗш класс хыççăн хулари медицина училищине вӗренме кӗнӗ, каярах медицина сестри пулса ӗçленӗ. И.Н. Ульянов ячӗллӗ Чăваш патшалăх университетӗнчи медицина факультетне пӗтернӗ хыççăн врач-педиатрта ӗçлеме вырнаçнă.
«Професси пӗлӗвӗ вăл – никӗс кăна. Педиатр ӗçӗнче ачасене юратни, чăтăмлăх, çынсемпе хутшăнма пӗлни тата вак-тӗвексене тимлӗх уйăрни пӗлтерӗшлӗ», – палăртать çамрăк тухтăр.
Ӗçри йывăрлăхсем çинчен
Ӗçре тӗл пулакан тӗп йывăрлăхсем çинчен ыйтсан тухтăр яваплăха, документсемпе ӗçлессине тата ашшӗ-амăшӗн шанăçне çӗнсе илессине палăртать. Ара, ача хăйне мӗн пăшăрхантарнине яланах калаймасть-çке.
«Диагноз пирки иккӗленетӗп пулсан, заведующирен е опытлăрах ӗçтешрен канаш ыйтма нихăçан та вăтанмастăп. Аслă юлташпа канашлани маншăн намăс мар, тӗрӗс япала тесе шутлатăп. Кун пек чухне пациента сиен кӳме намăс», – шутлать Анастасия Ивановна.
Пушă вăхăтра çамрăк хӗрача кӗнекесем вулать, çутçанталăк илемӗпе киленме юратать, хальхи сиплев меслечӗсене пӗлсе тăрас тесе медицина литературине тишкерет.
Ӗçшӗн Награда
«Чи пысăк награда – тепӗр хут тухтăр патне килсен ача кулни. Ачасене юратмасăр педиатр пулма юрамасть. Сиен кӳменни, ача сывă ӳстӗр тесе мӗн кирлине пурне те туни пӗлтерӗшлӗ», – шутлать Анастасия Матросова.
Тутарстанра çамрăк специалистсене пулăшассине пысăк тимлӗх уйăраççӗ. Аса илтеретпӗр, республикăра «Продолжительная и активная жизнь» наци проекчӗ шайӗнче «Медицинские кадры» программа ӗçлет, вăл çамрăк тухтăрсене сывлăх сыхлав тытăмне явăçтарма пулăшать.
Нет комментариев