Мария Семеновна Петрова 100 çул тултарчӗ

Тыл ӗçченне пӗр ӗмӗрхи юбилей ячӗпе ырă та ăшă салам сăмахӗсем калама Аксу районӗнчен те ятарласах делегаци килсе çитрӗ. 

– Эсир пирӗншӗн тӗслӗх, – терӗ Саврăшпуç ял хутлăхӗн пуçлăхӗ Валерий Николаев. – Сирӗн ачалăхăрпа çамрăклăхăр кăткăс вăхăта лекнӗ, нумай йывăрлăх витӗр тухма тивнӗ сирӗн. Эсир паянхи кун пирӗнпе юнашар пулнишӗн чӗререн савăнатпăр эпир, ӗмӗрӗпе тăрăшса ӗçленӗшӗн тав тăватпăр, юбилей ячӗпе ăшшăн саламлатпăр! 100 çулхи юбилей этемшӗн питӗ пысăк çитӗнӳ вăл. Эсир ыттисене те аван пурăнма, пурнăçа хаклама хавхалантаратăр. 

Валерий Зиновьевич Мария Семеновна ячӗпе РФ Президентӗнчен В.В.Путинран тата ТР Раисӗнчен Р.Н.Миннихановран килнӗ саламлă çырусене вуларӗ, чечек çыххипе парне пачӗ. 

Çавăн пекех юбиляра РФ Патшалăх Думин депутачӗн Олег Морозовăн пулăшуçи, Аксури «Нежность» социаллă тивӗçтерӗвӗн комплекслă центрӗн килте пулăшу парас енӗпе ӗçлекен уйрăмӗн заведующийӗ Ольга Миронкина та саламларӗ, депутат ятӗнчен микроволновка парнелерӗ. 

– Сире пурсăра та пысăк тав мана хисеп туса саламлама килнӗшӗн, – чунтан тав турӗ Мария Семеновна килнӗ хăнасене. – Пурин те ман çула çитмелле пултăр!

Марье аппан пурнăçӗ çăмăл килмен. Ача чухнех колхозра ӗçлеме пуçланине, унтанпа питӗ нумай çул иртнӗ пулин те, питӗ лайăх астăвать вăл. Кăвак çутăллах тăрса ӗçе васканă, выçăллă-тутăллă, шăнса çӳренисем те пайтах пулнă. Вăрçă вăхăтӗнче уйрăмах йывăр пулнă. 

Çитӗнсе çитнӗ Хырăшне хӗрне Саврăшпуç каччи Михаил Петров куç хывнă та хăйӗн тăван ялне качча илсе кайнă. Виçӗ хӗрпе виçӗ ывăл çуратса ӳстернӗ Петровсем. Михаил Александрович 2008 çулта 82 çула çитсе çӗре кӗнӗ. Ӗмӗр тăршшӗпе тракторпа ӗçленӗ               çемье пуçӗ, Марье аппа вара – тӗрлӗ ӗçсенче. Шел, икӗ ывăлӗ çут тӗнчере çук ӗнтӗ Петровсен. Мария Семеновнăн 15 мăнук, 9 кӗçӗн мăнук тата 4 кӗçӗн мăнукӗн ачи. 

Марье аппа вăрăм ӗмӗрлӗ çынсен йăхӗнчен. Ашшӗ 90 çултан иртнӗ, амăшӗ 102 çул тултариччен сывлăхпа пурăннă. Аппăшӗн 100 çулхи юбилейне Емелькинăра пурăнакан йăмăкӗ Ольга Семеновна Мартынова та килнӗччӗ. 85-ре тесе калама çук ăна – чупса кăна çӳрет-ха вăл. 

– Эпир анне сывă пулнăшăн çав тери савăнатпăр, çулне кура мар ăнӗ çивӗч-ха унăн, – тет Мария Семеновнăн хӗрӗ Галина. – Пурнăç тăршшӗпе нумай тӳсме тивнӗ ăна. Эпир аннен кашни кунӗ савăнăçлă, лăпкă ирттӗр тесе пӗтӗм вăйран тăрăшатпăр. 

Зинаида ЛЕОНТЬЕВА.

Автор сăнӳкерчӗкӗсем.