Теччӗре туя туй пек тăваççӗ

Петрпа Василина ыттисенчен урăхларах туй туса пӗрлешме ӗнер-паян кăна шутламан, «Татар-информ» ИА пӗлтернӗ тăрăх, пӗр-пӗрне вӗсем 9 çул пӗлеççӗ.

– Хам эп Кильдюшевăран, мăшăрăм Пухтелрен. Хусанта пурăнатпăр эпир. Мăшăрăм ман çар çынни, нумай пулмасть кăна-ха ятарлă çар операцийӗнчен командировкăран таврăнчӗ. Уншăн çав тери пăшăрхантăм, таврăнасса куç пек кӗтрӗм.Таврăнсан çав тери хытă савăнтăм»,– тет Василина хăйсемпе кăштах паллаштарса. Теччӗ – нумай нациллӗ район. Хутăш çемьесем кунта çӗнӗлӗх мар. Петр та акă – чăваш каччи, Василина вара  – мăкшă хӗрӗ. Вӗсем пӗр-пӗрне юратса пӗрлешеççӗ. Çамрăксене саламламашкăн тăванӗсем хăйсен наци тумӗсемпе килни çемье уявне тата хитререх кăна тунă.

– Паян пирӗн çемье йӗркеленчӗ кăна мар, темиçе хут ӳсрӗ те. Эпир ытти халăхсене хисеплеме хăнăхнă çынсем, халӗ акă хамăр та вӗсен пӗр пайӗ. Пирӗн çемьесем тăванлашрӗç, тăвансен шучӗ хушăнчӗ. Паллах, атте-аннесене, асатте-асаннесене, кукамай-кукаçисене, пичче-аппасемпе вӗсен ачисене савăнтарса хамăр та ăрăва малалла тăсма шутлатпăр, – савăнăçлăн пӗлтерет тин кăна пӗрлешнӗ мăшăр. Петрпа Василинăна пӗрлешнӗ ятпа эпир те чӗререн саламласа темӗн пысăкăш телей, юрату тата сак тулли ача-пăчаллă пулма сунатпăр! (Сăнӳкерчӗксем ГалинаТазетдинован)