«ПУРНĂÇ ЙЫВĂÇÇИ» ӲССЕХ ПЫРАТЬ

Йӗркелӳçӗсем, фестивале хутшăнакансем тăрăшса хатӗрленнӗ августăн 7-мӗшӗнче, юнкун, çанталăк сасартăках улшăнни кăна кăмăла пăсрӗ кăштах. Шăп фестиваль уçăлас умӗн Хусан варринче лӳшкесе çумăр çурӗ. Çакна пула Горький ячӗллӗ культурăпа кану паркне çул тытнисенчен хăшӗсем палăртнă çӗре çитеймерӗç. 

Апла пулин те çумăр çунипе мероприятие урăх вăхăта куçармарӗç йӗркелӳçӗсем. Тӗрӗс турӗç те. Мӗншӗн тесен ачасен ансамблӗсен концерчӗ калама çук чаплă пулчӗ. Фольклор юрри-кӗвви ачасем юрласан, ташласан тата чӗррӗнрех илтӗнет пек туйăнать. «Пурнăç йывăççи» сцени çинче Çӗнӗ Шуçăм районӗнчи Людмила Ильдулова ертсе пыракан  «Родничок» ансамбль те пултарулăхне кăтартрӗ. 

Уçланкăрах наци «çурчӗсем» ларса тухнă. Кашни халăхăн хăйӗн палатки, ăна наци çуртӗнчи пекех хăтланă. Паллах,  кашнин «çуртӗнче» пепке сăпкара выртать. Аслисем вара унпа çыхăннă йăласене кăтартаççӗ. Нурлат районӗнчи Чăваш наципе культура центрӗн ертӳçи Г.В.Терентьева ертсе килнӗ Киклӗпуçӗнчи «Çеçпӗл» ансамбль ачана ят хунин йăлине кăтартрӗ. Çак пысăк уява килнисене хăналама сӗтелне те янтăланă. Фестиваль вӗçлениччен те татăлмарӗ иртен-çӳрен чăвашсен «çуртӗнчен»: апат-çимӗçне те тутанса пăхасшăн, юрă юрлама ыйтакансем те пур, пӗрле ларса сăн ӳкерӗнесшӗннисем те йышлă.

Мастер-классем ирттерекенсем патӗнчен хальхинче те çын татăлмарӗ – ача-пăча çеç мар, аслисем те хаваспах çӗнӗ ӗçе хăнăхасшăн. Тăм шăхличсем, чӳлмексем тума вӗрентекен Пăва ăсти Павел Ярхунов ӗç мелне хăнăхтарнипе пӗрлех нӳрӗ тăм кӗлеткесене мӗнле типӗтмеллине те каласа ăнлантарать. Юнашарах сӗтел тавра пухăннă – керамикăна сăрăсемпе илемлетме вӗрентеççӗ. 

Марий Эл Республикинчи Звенигово хулинчен килнӗ ăстасем ӗмӗтленнине пурнăçлама пулăшакан пуканесем ăсталаса кăтартаççӗ. 

Ачасене халалланă фестивальте вăйă выляманни тӗрӗс мар пулӗччӗ. Çакна шута илнӗшӗн йӗркелӳçӗсене ырлас килет. Выляса ача хăйӗн пултарулăхне аталантарать, тантăшӗсемпе хутшăнма вӗренет, юлташсем тупать. Кашни халăх хăйӗн вăййине ирттерчӗ, хутшăнас текенсене пурте хапăл пулчӗç, куракансем те интересленсех сăнарӗç.

Татьяна ВАСИЛЬЕВА.

Л.Ильдулова сăнӳкерчӗкӗ.