Тӗрӗк тата иран халăхӗсен уявӗнче чăваш пики çӗнтерчӗ

Уява Хусанти ипподромра ирттереççӗ. Хăнасене тӗрӗк тата иран халăхӗсен апат-çимӗçӗ, мастер-класӗсеме, ал-ӗç хатӗрӗсен куравӗ, ача-пăча вăййисем, концертсем, ăмăртусем кӗтрӗç. 
Уява килнисене Тутарстан влаç органӗсен представителӗсем, ТР Халăхсен ассамблеин тата Туслăх Çурчӗн ертӳçисем, Казахстан, Узбекистан, Иран, Китай дипломати представительствисен пуçлăхӗсем, наципе культура автономийӗсен председателӗсем саламларӗç. 
Саламлă сăмахсем хыççăн уяв концерт программипе малалла тăсăлчӗ. Куракансене çак уява паллă тăвакан халăхсен артисчӗсем юрласа-ташласа савăнтарчӗç: тутарсен, пушкăртсен, чăвашсен, азербайджансен, узбексен, казахсен, кăркăссен, таджиксен, туркменсен, якутсен, афгансен, тувасен. 
«Плов фестивалӗнче» 11 повар-конкурсант хутшăнчӗ. Çӗнтерме вара таджиксен рецепчӗ пултарчӗ. Поварне така парнелерӗç. 
Кăмăл тăвакансем «Наврус паттăрӗ» ята çӗнсе илессишӗн тупăшрӗç. Çӗнтерес тесен унта хутшăнакансен вăхăта автомобиль сӗтӗрмеллеччӗ. 
Уява «Наврус чиперӗ» конкурс вӗçлерӗ. Тӗп титулшăн тăхăр халăх пики тупăшрӗ, çав шутра чăваш хӗрӗ те. Пирӗн çамрăксен «Аталан» пӗрлешӗвӗн председателӗ ӗлӗкши каç конкурсăн Туслăх Çурчӗн концерт залӗнче иртнӗ пӗрремӗш тапхăрӗнче çӗнтернӗччӗ ӗнтӗ. «Наврус чиперӗн» финалӗнче те Юлия Еремеева пӗрремӗш пулса коронăна илме пултарчӗ. Иккӗмӗш вырăна Кăркăсстан пики йышăнчӗ, виççӗмӗшне – Узбекистанăн. Онлайн-сасăлав пӗтӗмлетӗвӗсемпе куракансен симпатийӗн призне Пушкăртстан хӗрӗ Луиза Мухаметжанова илчӗ.